Testaman de Beaudelaine Pierre

Yon atik ke Mario Malivert ekri

Balon foutbòl sou kouvèti Testaman, yon liv ke Beaudelaine Pierre ekri, pa vrèman atire atansyon. Menm jan an tou, de ti liy, ki di ke liv-sa te pran premye pri nan konkou Jounal Bon Nouvèl nan lane 2002, te anfouraye nan mitan touf zèb. Epoutan, lè ou louvri liv la, ou byen sezi dekouvri yon zèv ki merite plas li nan literati kreyòl la.

Liv la kòmanse ak ti fraz senp ki pale de la nati : solèy, pye bwa, van, etc. Tou swit, otè ya tonbe pale de li, de jan li fò nan foutbòl, jiskaske moun bò kote l ba l tinon Tifout. Déjà, ou atann ou ak yon istwa sou yon jèn Ayisyen ki renmen foutbòl anpil. Men se pa sa ditou, paske byen vit, otè ya entwodui yon pèsonaj, ki chaje ak mistè, ki rele Pèzo. Nan tout rès liv-la, otè-a pral rete gaga devan sajès Pèzo.

Kreyativite Beaudelaine Pierre se pa nan pwovèb yo ni nan prensip Pèzo yo, men se nan plase yo nan kad yon listwa, nan kad yon peyizaj, ki pafwa chaje ak mèvèy. Baudelaine Pierre montre li pa lwen ekriven reyalis mèveye yo, ki prèt pou defòme lanati, ki pa pè fè nou kwè nan sa ki lwen reyalite.

Testaman te ka pi djanm toujou si Beaudelaine Pierre tal pi lwen toujou nan devlopman pèsonaj Pèzo-a e nan konpleksite ansèyman li yo. Nan chache kenbe liv la senp, pou tout moun ka konprann, otè ya petèt rate yon okazyon pou l te akouche youn nan kèk woman literè ki soti nan literati kreyòl-la.

Beaudelaine Pierre, Testaman, Jebca Editions, 2013.

Mario Malivert, 15 jen 2015